عيدالام

بسيط وابنه الصغير سهل

– سهل : بابا عاوز اجيب هدية للميس.

– بسيط : ليه خير ايه المناسبه يعنى.

– سهل : يا بابا عيد الام انت مش متابع ولا ايه .

– بسيط : لا متابع يا لمض بس مش لازم هدية يعنى.

– سهل : ما كل العيال بيجيبوا لمدرساتهم اشمعنى انا يعنى وبعدين ميس حنان بتركز مع الحاجات دى وهتقرفنى بقيه الترم.

– بسيط : قلها ان عيد الام بيوافق يوم عيد النوروز عند الفرس عبدة النار الكفار وعيد الام يبقى حرام فى اليوم ده.

– سهل : ….!!!..بابا هات 100 جنية.

– بسيط : انا لسه جايب لامك عباية ومماعيش فلوس..بص العباية جديده بشوكها اسرقها بالليل من غير ما ناخد بالنا واديها للميس بتاعتك.

– سهل : عباية ماما ايه بس يا بابا ..ماما تخينه قوى ولو اديت عبايتها لميس حنان هتعملها ملاية سرير.

– بسيط : ليه هى ميس حنان رفيعه زى نانسى كده مثلا..ولا زى صوفيــــ…….. احممممممممم….المهم ..خد عشرين جنيه ايه واتصرف.

– سهل : عشرين جنيه ؟؟دى ما تشتريش حاجه …..دى علبة الكيوباترا بقت بعشره جنيه. – بسيط : الله يخرب بيت الفيس بوك اللى خلى العيال حافظه المنيو بتاع الشرقيه للدخان..مفيش غير دول هاتلها كولونيا خمس خمسات ولا ريحه سيكرية بتاعة قسمه والشبراويشى ولا اى زفت عليك وعليها وحل عن نفوخى. .

–سهل يذهب لعم حقنة الاجزاخنجى اللى بيقف فى الصيدلية الصبح لحد ما الدكتور يجى.

– سهل : عم حقنه ..ادينى ازازة خمس خمسات تكون حلوة كده.

– حقنة : خمس خمسات ايه يا ابنى دى بطلت تتعمل من زمان..مين اللى قالك عليها دى.

– سهل : ابويا اللى قالى عليها …بص هات اى ازازة ريحه ب20 جنيه وخلاص.

– حقنة : خد دى حلوة والكل بيشتريها .

سهل ياخد الازازه ويلفها بالجلاد الاحمر اللى خلعة من جلدة كشكول النشاط اللى مالوش لزمة ويروح على المدرسه.

– سهل : ميس حنان كل سنه وحضرتك طيبه يا ميس حنان بحبك قوى يا ميس حنان.

– حنان : وانت طيب يا روح قلبى..ايه اللفه اللى فى ايدك دى يا حبيبى.

– سهل : دى هديه لحضرتك يا ميس ..اتفضلى.

حنان تاخد الهدية من سهل وتفتحها

– حنان : ايه ده يا حيوان ياسافل ..حتة عيل زيك بتمسخر بيا جايبلى افتر شيف لبعد الحلاقه..ليه شايف دقنى منبته ولا بارمه شنبى خد القرف ده واستنى اللى هيحصلك لاخر السنه ده انا هوريك ايام سوده.

سهل يرجع من المدرسه حزين ويلعن فى شورة ابوة السوده ويلعن فى عم حقنه وفى اليوم اللى اتولد فيه ويدخل البيت ينادى على والده…بابا…بابا

– بسيط :عايز ايه يا سيدى.

– سهل : خد جبتلك هديه بمناسبة عيد الام كل سنه وانت طيب .

نوادر المواطن بسيط من تأليف المهندس والفنان م/ احمد عصمت.

مؤلف معتمد في موقع ابلة ظاظا – ممنوع منعا باتا النقل او الاقتباس.